Olav H. Hauge

 Attum einsemds berg

Ho er søt, einsemdi,

so lenge vegen attende

til dei hine

er open.

For du skin ikkje

for deg sjølv.

Men den dagen berget

dett i

attum deg,

stend du og ropar

i blind angst

og slær knokane

mot ein stengd vegg.

Og du klagar til stjernone,

steinane, havet og vinden

og trur dei veit

og gjer deg

ringare enn dei.

Å, du attum einsemds berg!

Det renn attende

so løynd ei elv,

um du som Sinbad

torde fylgja henne.